இரவல்

மீன் குழம்பு கணவனுக்கு பிடிக்கும் என‌
மீன் கடையில் சொல்லி
இரவல் வாங்கிய போதும்...
மளிகைக் கடையில் கடன் சொல்லி
மாதா மாதம் பொருட்களை
இரவல் வாங்கிய போதும்...
முன்னறிவிப்பு இல்லாமல் வந்த விருந்தினருக்கு
அவசரமாய் தேவை என பக்கத்து வீட்டில்
காபிப்பொடி இரவல் வாங்கிய போதும்...
எப்போதும் வருந்தியதில்லை...
குழந்தைப்பேறு இனி இல்லை
என்று நிச்சயமாய் தெரிந்தபின்
அனாதை விடுதியில்
குழந்தையை தத்தெடுக்கும் போது
வெடித்து அழுகிறாள் அவள்...
தாய்மையையும் இரவல்
வாங்க நேரிட்டதால்...